A segunda edición de Startup Weekend Galicia terá lugar en Vigo entre os días 1 e 3 de xullo

Tras o éxito da primeira edición galega de Startup Weekend que tivo lugar en Santiago de Compostela en xuño de 2010, as oficinas de Elogia en Vigo acollerán este ano o evento que terá lugar entre os días 1 e 3 de xullo, xuntando durante 54 horas frenéticas a un grupo de persoas con distintas habilidades (principalmente desenvolvedores, programadores, deseñadores e xente de marketing e negocio) para traballar xuntos para dar pé a aplicacións web ou móbiles que poidan servir para un proxecto viable, ilustrando así sobre as posibilidades que o traballo en grupo e as sinerxías poden achegar ao emprendemento tecnolóxico.
A serie de eventos Startup Weekend naceu en 2007 da man de Andrew Hyde como un concepto de conferencia enfocada a aprender creando, destacando polo toma rápida de decisións, o pensamento creativo e facilitando que os participantes amosen o que saben e poden facer. Esta proposta conseguiu boa aceptación internacional, de xeito que agora está presente en máis de 35 países de todo o mundo. No caso de España o encontro ten presenza en Galicia, Barcelona e Madrid, e precisamente a última edición madrileña rematou co trunfo dun proxecto liderado por un emprendedor establecido en A Coruña.

A mecánica de Startup Weekend

Este tipo de xornadas comezan por unha primeira sesión na que os participantes presentan as súas ideas nun formato de elevator pitch (1 minuto por idea), de xeito que as máis votadas serán as que se desenvolverá por equipos durante o resto da fin de semana. Os equipos contarán con mentores en distintas áreas (xestión empresarial, desenvolvemento de negocio, marketing, financiamento…).
Durante o sábado e o domingo tamén hai preparadas varias charlas, así como conexión vía Skype con startups e mentores en EE.UU.
O obxectivo é que ao rematar a fin de semana os equipos poidan presentar os seus proxectos ante un xurado que elixirá aos 3 mellores, e un dos equipos poderá pasar directamente como finalista e poderá presentar o seu proxecto ante investidores de Vindeira Capital Network, o principal encontro de investimento de Galicia.

Vídeo que resume a edición de 2010 do encontro