A telefonía móbil perdeu 226.268 liñas en agosto

A Comisión do Mercado das Telecomunicacións (CMT) vén de publicar a súa nota correspondente ao mes de agosto (descargable en formato PDF), facendo unha radiografía do sector das telecomunicacións en España, que parece continuar coa tónica dos meses anteriores, reflectindo unha perda de 226.268 liñas móbiles, o que acumularía 1,31 millóns de liñas de caída no que vai de ano, aínda que se facemos unha comparación do pasado mes de agosto co de agosto de 2011 a caída experimentada quedaría en só un 2,1%.
As compañías que máis padecerían a perda de liña serían Movistar e Vodafone, mentres que o resto de operadores conseguen incluso captar liñas.
Durante agosto o número de liñas móbiles de contrato medrou en 59.265, o que non puido compensar a caída de 227.876 liñas de prepagamento e 57.657 de datos.
No sector da banda larga considérase que estamos ante un estancamento, con 6.774 liñas novas en FTTH e 3.937 liñas menos de cable e 567 menos de xDSL, mentres que a telefonía fixa continúa a caer (con 49.089 liñas menos).