A telefonía móbil perdeu 238.428 liñas en xuño

Ganancia neta de liñas móbiles no mes de xuño

A Comisión do Mercado das Telecomunicacións vén de publicar a súa nota mensual (en formato PDF) co balance do sector da telefonía e as conexións á Rede en España correspondente ao mes de xuño, rexistrando unha perda de liñas de 238.428, que correspondería principalmente aos operadores Movistar e Vodafone, mentres que Orange, Yoigo e os operadores móbiles virtuais (OMV) continúan a captarlles clientes. Estariamos ante a primeira ocasión que o mes de xuño rexistra unha caída interanual de liñas móbiles, aínda que só fose do 0,9% (quedando en 54.644.316 liñas). Pola contra, o sector da banda larga consegue avanzar, incrementando en 9.655 o seu número de liñas.
En xuño os operadores móbiles rexistraron 395.727 portabilidades, das que 201.830 corresponderían a Movistar e 160,940 a Vodafone, o que ocasinoulles unha perda neta de 55.449 e 73.986 liñas respectivamente. Pola súa banda Yoigo gañou 43.477 liñas e os OMV fixéronse con 68.476 liñas no mes de xuño.
No caso da telefonía fixa non houbo sorpresas, e en xuño caeron 48.514 liñas, tendencia que xa leva varios anos e que vén provocada tanto pola conxuntura económica como pola caída de uso provocada polo éxito da telefonía móbil.