As penalizacións de permanencia serán proporcionais aos días que queden de contrato

O pasado 27 de marzo o Senado aprobou a nova lei de Defensa dos Consumidores e Usuarios, que entrará en vigor o 13 de xuño, e que, entre as súas medidas, inclúe unha esixencia histórica dos consumidores, que consiste en que as penalizacións por non cumprir un compromiso de permanencia dun operador de telefonía móbil deixe de ser unha cantidade fixa arbitraria, e pase a ser unha cota proporcional ao número de días que quedan para a finalización do contrato, facilitando que os usuarios poidan mudar a súa tarifa sen ter que facer fronte a uns cargos claramente inxustos (ou cuns períodos de revisión demasiado grandes).
Esta medida estaría a corrixir unha das cláusulas abusivas máis frecuentes nos contratos de telefonía móbil, con casos nos que a penalización por non respectar a permanencia por ter adquirido un terminal subvencionado chega incluso a medrar segundo pasaba o tempo, en vez de reducirse como sería natural. Agardemos que en futuras revisións lexislativas continúen a avanzar na mesma liña, eliminando outros atrancos que teñen os consumidores para exercer a súa liberdade de elección de operador telefónico.