Camisolas + SMS = Reactee

O aproveitamento das mensaxes SMS a través do móbil é algo habitual por parte de programas de televisión, pero agora tamén están mirando de facer algo bo delas mediante camisolas, pois a compañía Reactee está a vender prendas de roupa personalizadas cunha mensaxe que incita a mandar unha SMS a un número especial que reaccionará segundo a configuración do usuario que mercou a camisola. Así, os remitentes da SMS poden facer chegar unha mensaxe ó propietario da camisola, poden recibir un texto automático de resposta ou mesmo se poden subscribir a unha canle informativa.
Deste xeito as camisolas poden servir para apoiar causas políticas, humanitarias ou de calquera outro tipo, pero tamén para comunicarse cunha persoa cun certo anonimato, polo que poden resultar incluso un método para ligar (xa que se poden recibir mensaxes sen ter que darlle o número de teléfono a ninguén).
Como exemplos temos que podemos expresar o noso apoio a Hillary Clinton para as presidenciais norteamericanas remitindo unha SMS ó 41411 co texto VOTEHILL ou co texto OBAMA se queremos apoiar a Barack Obama, mentres que si escribimos a palabra chave IHSJAGUARS poderemos recibir os resultados dos partidos do equipo de fútbol americano Jaguars (para o que o sistema pedirá verificación para evitar altas fraudulentas ou accidentais). Tamén é posible que remitindo mensaxes ó número antes indicado cunha PALABRACHAVE + TEXTO se poidan facer chegan comunicacións ó propietario da camisola.
Estes servizos de SMS están subministrados pola empresa TextMarks, que mesmo permite incorporar as súas funcións a páxinas web, pero que atopou nas camisolas un xeito moi orixinal de chegar ó grande público (aínda que nada impediría que un usuario empregase directamente TextMarks e fixese el mesmo a camisola correspondente).
Este servizo só está dispoñible nos EE.UU., pero de acadar éxito non sería de sorprender que outras empresas o emulasen en Europa.