Comezan a coller corpo as xornadas internacionais sobre marketing político 2.0 de Santiago

Fálase moito das posibilidades das redes sociais para as empresas e os negocios, pero se cadra non se fala tanto como se debera do potencial destas ferramentas para a política. Co fin de encher este importante baleiro, Candedo organiza en Santiago, os vindeiros 14 e 15 de setembro, as Xornadas de Marketing Político 2.0, uns encontros que xa contan con páxina web a pleno rendemento e que traerán á cidade de Compostela “relatores de prestixio para afondar nos máis axeitados métodos 2.0 a prol da rendibilidade das campañas de tipo político e outras accións de comunicación das nosas entidades”.
O evento, que agardamos incorpore en breve contidos en galego (incluíndo unha versión da páxina web na nosa lingua), desenvolverase en diferentes tipos de exposicións e relatorios, como por exemplo a través de explicacións maxistrais da man de profesionais da comunicación da primeira liña internacional, ou ben con feitura de exposicións de experiencias e casos de éxito de persoas que tiveron ocasión de empregar a fondo as tecnoloxías sociais para pór en marcha accións diversas de difusión e captación de seareiros.
No programa tamén está prevista unha videoconferencia dende Hispanoamérica para que “comunicadores de outros países compartan con nós os seus coñecementos e outros puntos de vista”, sinalan os organizadores do evento.
En breve tamén se dará comezo ás actividades de divulgación e promoción da xuntanza en toda España e Portugal, nos concellos, nas deputacións, nas comunidades autónomas, a través de correos electrónicos, informacións web, redes sociais, medios tradicionais, entrevistas.