Disney+ e atresplayer estrean un plan de subscrición conxunta

Atresmedia e Disney asinaron un acordo para ofrecer aos novos subscritores o paquete premium de atresplayer e o estándar con anuncios de Disney+ como unha subscrición conxunta a un prezo de 8,49 euros/mes o que supón un aforro con respecto aos 10,98 euros/mes que custarían os plans contratados por separado.
O plan atresplayer Premium Disney+ pódese adquirir só a través de atreplayer, dispoñible para novas altas con pagamento por tarxeta e Paypal, facilitando o acceso a todo o catálogo de plataforma de Atresmedia e a oferta de Disney, Pixar, Marvel, Star Wars e National Geographic, así como as películas e series de Star dirixidas a un público adulto.
Este tipo de contratación é moi habitual nos EE.UU., sorprendendo que estea a ofrecerse en España mesturando plataformas globais con plataformas locais. Dado as dificultades que están a experimentar todas as plataformas de vídeo baixo demanda para competir con Netflix, é de esperar que vexamos máis ofertas de servizos agregados, do mesmo xeito que en outubro Max integrou DAZN nos seus plans de subscrición.