En outubro de 2014 medrou a banda larga e caeu a telefonía móbil

Ganancia neta de liñas de banda larga en outubro de 2014 (en milleiros)

A Comisión Nacional do Mercado da Competencia está a informar da situación do mercado das telecomunicacións en España o pasado mes de outubro, arroxando resultados positivos no que se refire ás liñas de banda larga e, en especial, de fibra óptica ata o fogar (FTTH) mentres que a telefonía móbil volve a resultado negativos.
En outubro o número de liñas de banda ancha en España teríase incrementado en 99.422, o que supón un crecemento interanual do 6%. Das novas contratacións, 121.591 liñas corresponden a conexións FTTH, de xeito que esta tecnoloxía sumaría xa 1.343.754 liñas, o que vén a ser un 147,3% máis que o ano anterior. Curiosamente Telefónica (principal promotora das conexións FTTH) só tivo unha ganancia neta de 6.891 liñas, mentres que as compañías de cable conseguiron 28.466 e os operadores alternativos fixéronse con 64.070 liñas.
Telefónica tamén sairía mal parada nas liñas de telefonía móbil, sendo Movistar o operador con maior perda neta de liñas rexistrada, con 71.562 liñas menos, mentres que Vodafone, Yoigo e Orange perderon 21.671, 15.033 e 7.861 liñas respectivamente, sendo os operadores móbiles virtuais os grandes beneficiados, cunha ganancia neta de 37.950 liñas.
En xeral, a telefonía móbil perdeu 78.177 liñas en outubro, provocado en grande medida polo acusado descenso de liñas de prepagamento (216.523) que o aumento en liñas de contrato (138.346) non puido compensar. En contraste, a telefonía fixa, que cada vez ten unha menor importancia, rexistrou un crecemento de 31.133 liñas.