Este venres inaugúrase unha nova edición da festa informática FIC OnLan
xoves, 3 de marzo do 2011
A Facultade de
Informática da Universidade da Coruña acolle os vindeiros días, dende este
venres até o martes 8 de marzo, a edición 2011 da xuntanza informática FIC OnLan, unha festa para a mocidade en liña
encamiñada a fomentar xeitos racionais de lecer en liña, a amizade, a
comunicación e o intercambio de coñecemento e habilidades. O encontro, que ten
un aforo de 250 prazas, está organizado polo colectivo Freak´s Party, un
colectivo integrado por alumnas e alumnos da dita Facultade e que conta xa
cunha completa experiencia organizando relatorios de carácter cultural e tecnolóxico.
FIC OnLan, que
xurdiu co reto de promover a cultura e o bo uso das novas tecnoloxías, incluirá
todo tipo de actividades: relatorios, certames, torneos e mesmo obradoiros
creativos. Asemade, informa a Universidade da Coruña, dará acubillo durante a súa
celebración a numerosos concursos arredor das cuestións que máis interese
espertan a día de hoxe entre a mocidade internauta, tanto para o seu
coñecemento persoal como no que atinxe ao mercado de traballo que lles agarda:
programación, deseño en 3D ou seguridade informática. A xuntanza está aberta tódalas
persoas que teñen interese por afondar no que saben do eido dixital e de todo o
que supón para o fluxo de datos, o lecer e o noso xeito de dialogar. O único
que se pide é que quen participa sexa maior de 18 anos ou de 16 sempre e cando
teña autorización tutelar.
O aforo deste evento é, como dixemos, de 250
prazas e os interesados poderán conseguir máis información sobre o programa e
métodos de inscrición na páxina web do evento
ou enviando un correo electrónico á súa organización.
O segredo das LAN parties
FIC OnLan é por
dereito propio unha lan party e, como
tal, é unha xuntanza de lecer e de coñecemento. Ou sexa, que non estamos
perante unha festa ao uso, con música a todo volume saíndo dos altofalantes, senón
dunha concentración de amigos da tecnoloxía e a informática dispostos a
compartir durante unhas datas determinadas as súas experiencias e traballos,
promovendo dende o comezo da xuntanza o compañeirismo e a diversión no seu
formato máis saudable.
A festa coruñesa
da que estamos a falar está organizada pola Asociación Freak´s Party na
Facultade de Informática da Coruña. O obxectivo é promover a cultura e a
afección ás novas tecnoloxías. O colectivo organizador é unha entidade de
alumnos da Facultade de Informática da Coruña que encamiñan o seu labor á
realización e organización de todo tipo de actividades culturais e tecnolóxicas
de divulgación; “empregando a party
FIC OnLan”, comentan, “como palestra
para novos eventos e relatorios, así como a FIC onWeb como plataforma para o
desenvolvemento de novas ideas e dunha comunidade dedicada á aprendizaxe e a
cultura tecnolóxicas”. Asemade, na súa axenda tamén teñen a FIC OnDev, un
evento dirixido á captación e promoción de novos talentos.