Este xoves abre as súa portas en Ferrol a sétima edición da Xuntanza Tecnolóxica

A Escola Universitaria Politécnica do Campus de Ferrol acolle a partir de maña (ata o venres 8 de abril) unha xuntanza encamiñada a fomentar o contacto entre as empresas tecnolóxicas que operan na nosa terra e a comunidade estudantil. Estamos a falar da Xuntanza Tecnolóxica, que chega á súa sétima edición e que vén da man dos alumnos da Escola Universitaria (organizadores do evento) coa colaboración da dirección deste centro e diferentes departamentos da Universidade da Coruña. O foro abrirá as súas portas ás 9.30 horas, dando acubillo a un acto de inauguración que contará coa presenza do reitor da UDC, José María Barja, o alcade de Ferrol, Vicente Irisarri, o director xeral de Xuventude, Ovidio Rodeiro, o director da dita Escola, Manuel Graña, o director de Navantia Fene-Ferrol, Esteba García, o decano da delegación de Ferrol de Coeticor, Olegario Míguez, e a representante da organización da Xuntanza, a estudante María Rodríguez.
O encontro, que contará co apoio de compañías de primeira liña do ámbito tecnolóxico (Bosch, Endesa, Schneider, Siemens, Sodeca, ABB, etc), diríxese pois a fomentar unha comunicación o máis directa posible entre empresas e estudantes, levándose a cabo procuras previas das compañías máis susceptibles de achegar formación innovadora e contratación futura.
“O que queremos lograr”, informan os organizadores da xuntanza “é que os alumnos e as empresas do sector industrial e naval poidan ter uns coñecementos actualizados e de calidade grazas a estes días de relación, no que non só nos formamos os alumnos, senón tamén as empresas que acoden ás conferencias unhas das outras”.
Este ano contarase cun bo número de apoios empresariais. Ás multinacionais devanditas cómpre engadir a participación este ano, por vez primeira de Red Eléctrica de España, Kuka Robotics, LCI Sistemas e ARA Solutions, entre outras. Un dos obxectivos deste encontro, precisamente, é tirar o máximo proveito da experiencia destas empresas para reforzar a formación dos estudantes que participen na xuntanza, a través de cursos e de relatorios (incluíndose, por certo, un debate sobre a enerxía nuclear e as consecuencias, que podemos ver estes días na catástrofe de Xapón), e tamén mediante as presentacións que se desenvolvan nos stands.