FACUA advirte das tarifas abusivas do roaming de datos

A asociación FACUA-Consumidores en Acción realizou un estudo sobre as tarifas de acceso á Internet que aplican as operadoras de telefonía móbil cando os seus usuarios viaxan a outros países, o que lévalle a advertir aos consumidores sobre a desproporción das cantidades que cobran de xeito xeral as distintas compañías, que fai que os turistas poidan levar máis dunha sorpresa ao volver das súas vacacións con facturas de centos de euros por conexións á Rede dende fóra do seu país pese a ter contratadas tarifas planas ou outras tarifas vantaxosas que modifican as súas condicións no estranxeiro.
FACUA colaborou nos últimos meses nas reclamacións de distintos usuarios que recibiron facturacións abusivas por conexións de datos dende o estranxeiro, ignorando que non podían facer uso da súa tarifa plana de Internet dende fóra de España, polo que dende a organización continúan a pedir que as operadoras informen aos seus clientes correctamente das súas tarifas, á vez que reclaman unhas tarifas máximas reguladas para evitar os excesos rexistrados.
Os exemplos do que pode custar unha descarga de datos dende o estranxeiro son escandalosos, pois irían dende 30 euros por un vídeo de menos dun minuto ata 3.500 euros por un episodio dunha serie de televisión, incluso dentro da Unión Europea onde cobrarían entre 1,79 e 11,60 euros por Mbyte transferido, aínda que hai a posibilidade de adquirir bonos diarios que por 13,92 euros permite a descarga de 50 Mbytes (algo bastante máis razoable) e bonos mensuais.
Aparte das persoas que viaxan ao estranxeiro, tamén teñen que ter certo tipo as persoas que vivan en zonas fronteirizas (coma en moitos concellos do sur de Galicia) onde unha conexión de datos a través dunha antena de fóra do país pode ocasionar algún que outro susto desagradable.