FACUA destaca que Vodafone é o operador móbil peor valorado

FACUA-Consumidores en Acción vén de publicar as conclusións da 6ª enquisa aos usuarios sobre a calidade das compañías de telecomunicacións móbiles, chegando a conclusións como que só o 2% dos 6.589 consultados pensa que as autoridades protexen ben os seus dereitos fronte aos abusos e fraudes das compañías de móbiles, mentres que o 65% considera que non os protexen nada e o 34% que fano pouco.
A consulta recolle que o 47% dos usuarios denuncian que o seu operador cobroulle algunha vez un servizo ou modalidade tarifaria que non contratara, e que o 43% dos usuarios queixáronse dalgún problema ao servizo de atención ao cliente nos últimos 6 meses. Sorprende ver que o 51% dos usuarios que presentaron algunha reclamación non recibiron resposta ou solución satisfactoria e no 27% dos casos nin sequera se molestan en contestar.
Separando por operadores teriamos que a facturación de servizos non solicitados chega ao 66% dos clientes de Vodafone consultados e ao 62% de Movistar, proporción que cae considerablemente no caso de Orange (32%) e aínda máis con outras compañías: Yoigo (13%), Simyo (8%) e Pepephone (5%). Estes resultados terían unhas proporcións semellantes no caso do cobro de chamadas non realizadas, que sería do 46% no caso de Vodafone e 40% no caso de Movistar, o que indica unha grande desconfianza por parte dos consumidores. A solicitude de baixas tamén rexistra grandes incidencias, e o 43% dos usuarios que solicitaron baixa recibiron facturas posteriormente.
No caso da cobertura, estamos ante un problema que afectaría ao 30% dos consultados, acentuándose no caso de Orange (co 46% de clientes indicando tal eiva).
Outro elemento a destacar é o relativo aos servizos de atención telefónica, que achegarían información sobre tarifas imprecisa e incorrecta para o 70% dos consultados, o que é especialmente gravoso no caso de Movistar (83%), compañía seguida por Vodafone (81%), que parecen estar a consolidarse como as que peor tratan aos seus clientes pese a que son as que dominan o mercado.