Fixan as tarifas que os operadores pagarán polo roaming dos seus usuarios

Dentro dun par de semanas aprobarase a proposta definitiva que porá fin ao roaming dentro da Unión Europea a partires do 15 de xuño de 2017, pero mentres van realizándose avances como un acordo entre operadores do que vén de dar conta a Comisión Europea, e que fixa uns prezos que terán que pagar os operadores cando un dos seus usuarios empregue a rede doutro en itinerancia, buscando que esas tarifas se acheguen a un custe real.
O acordo fixa que os operadores deberán aboar 3 céntimos de euro por chamada (fronte á proposta de 4 céntimos) e 1 céntimo por cada mensaxe de texto, mentres que para os datos fíxase unha tarifa decrecente, que parte de 4 euros por GB e iría caendo ata 1 euro, en vez dos 0,85 céntimos/MB propostos.
Estas medidas buscan que no futuro un cidadán europeo poida moverse con liberdade por toda a Unión facendo uso do seu smartphone como se estivese no seu país de orixe e sen ter que realizar pagamentos adicionais, o que precisa regularse con tino para que non afecte indirectamente ás tarifas (xa que os operadores si teñen que compensar aos de outros países polo uso das súas redes).
Cómpre salientar que xa son varios os operadores españois que se adiantaron á lexislación europea, ofrecendo o roaming europeo sen custo adicional cunhas condicións de uso razoable, que posiblemente sexan moi semellantes ás que fixará a Comisión Europea o 15 de decembro.