Flappy Bird chega á Epic Games Store para móbiles

O ano pasado foi moi rechamante o regreso do xogo Flappy Bird a través dunha compañía creada de xeito oportunista para aproveitarse do éxito da creación de Dong Nguyen, creador do xogo orixinal que no seu día decidiu retirar das tendas de aplicacións, valéndolle un carácter case mítico.
Aínda que esta versión tan reprobable de Flappy Bird non conseguiu o éxito que perseguía, agora busca conseguir maior visibilidade ofrecéndose de balde a través da tenda para dispositivos móbiles de Epic Games.
Deste xeito podemos descargar o novo Flappy Bird, que ofrece moitas máis funcións que o xogo orixinal, non todas positivas, xa que, aínda que a aplicación é de balde, integra publicidade, cobrando a cantidade de 2,69 euros se queremos eliminala. O xogo tamén conta cunha tenda de aplicacións na que adquirir lotes de cascos para o xogo que van dende os 0,89 euros por dúas unidades até 17,99 euros por un cento.
Temos así que o xogo opta por un modelo de negocio bastante ordinario, en vez de percorrer a senda do mundo cripto que prometía inicialmente.