Galitempo e Datos Gráficos, iniciativas recoñecidas no Premio Open Data do CPEIG
xoves, 14 de xuño do 2012
- De esquerda a dereita: David Mosquera, de HP; Fernando Suárez, presidente do CPEIG; Reyes Leis, concelleira de Turismo e Economía do Concello de Santiago; Adrián Moreno, gañador do primeiro premio; Emilio José Diez, de Bahía Software; e Ramón Antonio Parada, gañador do segundo premio
Finalmente o
traballo feito na nosa terra a prol de tirar abaixo as barreiras que
limitan o acceso ao coñecemento, comeza a ter os seus premios. E
nunca mellor dito. Por exemplo o que vén da man do Colexio
Profesional de Enxeñaría en Informática de Galicia (CPEIG),
que fixo entrega este xoves no edificio CERSIA (Santiago) do seu
primeiro Premio Open Data, un galardón que, como o seu
propio nome indica, encamíñase a destacar as vantaxes de facermos
innovación e permitir as máis amplas marxes de accesibilidade, uso,
adaptación e dispoñibilidade. En total, foron dous os proxectos
gañadores. O primeiro premio levouno Galitempo,
de Adrián Moreno Peña e Gonzalo Mateo Sixto, mentres que o segundo
galardón recaeu en Datos
Gráficos, de Ramón Antonio Parada Rodríguez.
De Galitempo, por
certo, xa temos falado en
Código Cero con motivo das vantaxes de información
meteorolóxica que lles achega aos usuarios de iPhone. Galitempo,
infórmanos o CPEIG, é unha aplicación para iOS que permite
consultar a información meteorolóxica de MeteoGalicia a través de
dispositivos como o devandito iPhone ou o iPad. A partir dos
ficheiros e imaxes subministrados decote por MeteoGalicia, a
aplicación procesa e amosa na pantalla os datos, adaptados ao
formato dos ditos aparellos e facendo que a consulta sexa rápida e
sinxela. Os responsábeis de Galitempo -que recibiron un total de 600
euros por quedaren clasificados no primeiro lugar-, Adrián Moreno
Peña e Gonzalo Mateo Sixto, son de Santiago de Compostela e
enxeñeiros técnicos en Informática de Sistemas pola USC.
Datos Gráficos, pola súa
banda, foi obxecto dos 400 euros que incluía o segundo premio.
Trátase dunha ferramenta que permite a visualización da información
do Instituto Nacional de Estadística (INE), instituto que salienta
pola gran cantidade de datos que pon en xogo sobre todo tipo de eidos
sociais, económicos ou demográficos. Estes datos non están ao
alcance de toda a sociedade e existen atrancos que impiden o pleno
uso dos mesmos entre as persoas con diversidades funcionais e
motrices. Cumpría polo tanto un recurso que habilitase unha ponte
entre a información e estes colectivos e aí entra en xogo Datos
Gráficos. “Mediante a ferramenta premiada”, informa o
CPEIG, “se unha persoa quere amosar datos nun estudo de mercado,
nun artigo xornalístico ou nun traballo escolar, entre outros
exemplos, poderá facelo sen precisar da axuda de persoal
especialista”.
O redondelán Ramón
Antonio Parada é un desenvolvedor de aplicacións web residente na
cidade da Coruña ao que só lle resta presentar o proxecto final de
carreira para converterse en enxeñeiro técnico informático de
Sistemas.
No acto de entrega dos
recoñecementos, participaron o presidente do CPEIG, Fernando Suárez
Lorenzo, e o secretario do ente colexial, Juan José González Cid.
Ademais, tamén asistiron os patrocinadores do evento: Emilio José
Diez en representación de Bahía Software e David Mosquera por
Hewlett-Packard. Tamén fixeron acto de presenza a primeira tenente
de Alcalde e concelleira delegada de Turismo e Economía de Santiago,
Reyes Leis.
Patrocinadores e apoios
O CPEIG agradécelles a
súa colaboración aos patrocinadores do premio: as empresas Bahía
Software e Hewlett-Packard, e o Concello de Santiago de Compostela.
Colaborou na iniciativa a Axencia para a Modernización de Galicia
(AMTEGA), da Xunta de Galicia. Actuaron como xurado do certame:
Fernando Suárez Lorenzo, presidente do CPEIG e presidente do xurado,
Juan José González Cid, secretario do CPEIG, quen foi tamén
secretario do certame; e como voceiros, Emilio José Diez Rico, de
Bahía Software; David Mosquera, de Hewlett-Packard, e o profesor
Alberto Bugarín Diz pola Universidade de Santiago de Compostela.