Gradiant informa das posibilidades do seu traballo en visión artificial
martes, 26 de abril do 2011
O centro galego Gradiant, emprazado no Campus
de Vigo, informou
os pasados días dos seus progresos en materia de tecnoloxía para converter
os aparellos móbiles nun importante complemento sensorial. En detalle, trátase
dunha liña de investigación sobre o alicerce do sistema operativo para móbiles
Android (moi afianzado hoxe en teléfonos intelixentes e tablets e no futuro en televisores, mp3, etc) que iría encamiñada a
conseguir novas aplicacións de visión artificial. O abano de funcionalidades
que se pode acadar con este novo tipo de visión é amplo de abondo. Entre as
aplicacións máis interesantes para Gradiant atópase a seguinte: o recoñecemento
facial.
De feito, e tal e como temos
sinalado nesta web, o centro galego conta cunha ampla experiencia neste
eido en concreto, de gran potencial cara o impulso definitivo da robótica, que
será quen de acadar estreitas interrelacións co seu contorno e, sobre todo, cos
seres humanos. A maiores, o traballo de Gradiant céntrase en novas
funcionalidades e aplicacións para permitir un intercambio seguro, eficaz e
inmediato de datos a través da información biométrica de cada quen.
Segundo conta o centro galego, a arquitectura
dun sistema de visión artificial baséase nun computador como eixe central e
unha serie de elementos tecnolóxicos periféricos. As perspectivas deste tipo de
desenvolvementos son cada vez maiores, sobre todo se temos en conta que dende
hai uns anos proliferan os móbiles con capacidades cada vez maiores para a
obtención de imaxes e a visualización da contorna. O último atranco que ficaba
por superar eran as limitacións de procesamento que achegaban, cousa que está a
piques de quedar definitivamente atrás, con smartphones
e tablets con maior potencia que
os achegan ás funcionalidades dun computador. Isto, engaden dende o centro
galego de I+D, vese beneficiado coa chegada de sistemas operativos dirixidos á
creación de aplicacións que “aumentan de
xeito decisivo as posibilidades de desenvolvemento”.
Ademais, o medre das
tendas de aplicacións en liña como AppStore ou AndroidMarket, contribúen a atraer
a atención de desenvolvedores e consumidores. “Esta situación bríndanos unha interesante oportunidade para migrar e
desenvolver novas aplicacións de visión artificial nestes dispositivos,
aproveitando a súa portabilidade e integración de sensores”, manifesta
Gradiant.