Horizon Zero Dawn estrea un modo de xogo con dificultade reducida

O xogo Horizon Zero Dawn conseguiu converterse nun dos grandes exclusivos de PlayStation 4 deste ano, achegándonos a un mundo postapocalíptico dominado por criaturas mecanizadas no que a protagonista, unha moza chamada Aloy, irá descubrindo escuros segredos neste xogo de mundo aberto que a partires de hoxe, a través do parche 1.32, conta cun novo modo de dificultade chamado Historia, que fai máis accesibles os combates para que os xogadores menos intensivos poidan centrarse en explorar o mundo e desenguedellar os seus misterios.
Principalmente o novo modo de xogo incrementa os datos infrinxidos polo xogador e reduce considerablemente o dano recibido, de xeito que os combates son máis doados de superar por xogadores pouco experimentados, co que dende Guerrilla Games buscan atraer a un maior número de xogadores.
O parche 1.32 tamén incorpora correccións a numerosos erros que foron atopando nos últimos meses, facendo así un xogo máis sólido antes do 7 de novembro, data para a que está programada a súa expansión, The Frozen Wilds, que está xa á venda de xeito anticipado a un prezo de 19,99 euros (17,99 euros para subscritores de PlayStation Plus).