Investigadores en Psicoloxía da USC achegan un videoxogo xacobeo para favorecer o avellentamento activo
xoves, 11 de novembro do 2021
- O uso de dispositivos favorece a autonomía e a actividade mental das persoas maiores /Imaxe de Santi Alvite
O
grupo Saúde Mental e Psicopatoloxía da USC está a traballar nas
posibilidades que as Tecnoloxías da Información e das Comunicacións
(TIC) achegan para o que se coñece como envellecemento activo, un
concepto que abrangue diferentes e complementarias metodoloxías para
garantir a saúde dos nosos maiores. Máis
polo miúdo, o grupo avalía a eficacia que pode acadar un videoxogo
en liña, unha plataforma virtual e a correspondente aplicación.
O
tipo de videoxogo desenvolvido non é outro que unha aventura gráfica
baseada no Camiño de Santiago. En detalle, céntrase nun personaxe
protagonista concreto, Jacobo, integrando ao xogador nunha narrativa
da que xorden interaccións con camiñantes e habitantes da contorna
xacobea, elementos diversos e crebacabezas. O obxectivo é achegar
ferramentas psicolóxicas e adestrar a capacidade cognitiva das
persoas usuarias.
A
intervención comprende oito módulos de 60 minutos de duración cada
un, a razón dun por semana, con tarefas entre sesións para
practicar as habilidades adestradas na súa vida real. Segundo
explica o grupo de investigación, o proxecto focalízase en tres
áreas: prevención da depresión, estimulación cognitiva e hábitos
de vida saudábel.
O
primeiro dos módulos presenta datos sobre os síntomas depresivos e
a necesidade do seu afrontamento activo, comezando pola
auto-observación e rexistro do estado de ánimo e ensinando unha
técnica de control da activacións (a respiración diafragmática
profunda). Os dous seguintes están orientados á activación
condutual, mentres que do terceiro ao quinto se introduce
psico-educación sobre os hábitos de vida saudábeis (sono,
actividade física e alimentación), así como estratexias para
desenvolvelos. Nos módulos sexto e sétimo adéstrase aos
participantes na identificación de pensamentos negativos e coo
cambialos por outros máis racionais e positivos. O último diríxese
a fomentar a autoestima e a prevención de recaídas.
“A
estimulación cognitiva e o adestramento en habilidades sociais son
contidos transversais ao longo de todos os módulos do videoxogo”,
explica o grupo de investigación da USC a respecto da natureza da
proposta, engadindo que a aplicación asociada ao xogo compleméntao,
estando sincronizada con el, e “permite ao usuario repasar o
aprendido, revisar os progresos, consultar as etapas do Camiño, ou
rexistrar as tarefas entre sesións, entre outras funcións”.