La Caixa e Microsoft impulsan xuntas solucións innovadoras en tecnoloxía
xoves, 14 de xaneiro do 2010
Juan María Nin, director xeral de La Caixa,
e María Garaña, presidenta de Microsoft
Ibérica, veñen de asinar un acordo estratéxico de colaboración, polo que a
entidade financeira confía na tecnoloxía de Microsoft
para impulsar a innovación e potenciar servizos de mobilidade, así como para implantar
solucións coas que incrementar a produtividade dos seus empregados e xerar
valor para os seus clientes.
Todo iso permitiralle a La Caixa,
segundo afirma, “poder dedicar máis tempo
a atender as súas prioridades de negocio e comerciais”.
Asemade, a adopción de tecnoloxía de Microsoft
suporá para La Caixa unha redución de custes, xa que
lle permitirá realizar un menor esforzo de administración e xestión das
plataformas, ademais de posibilitar un menor consumo de recursos tanto
enerxéticos coma tecnolóxicos.
Microsoft colaborará no deseño e implantación de solucións innovadoras no
ámbito da mobilidade xa que, segundo informan, “as novidades de Windows Phone para La Caixa
permitirán mellorar a oferta de servizos financeiros da entidade e ofrecer un
maior valor engadido aos seus clientes”.
Por outra banda, ambas entidades van
iniciar unha colaboración no ámbito de seguridade, a nivel internacional, para
unir esforzos no obxectivo común de alcanzar maiores niveis de seguridade en Internet.