Loroestudio leva ós móbiles os partidos da Recopa de Fútbol Sala

A empresa galega Loroestudio especializada en aplicacións java para móbil e TDT, segue a dar pasos no sentido de conseguir que os nosos terminais sexan cada vez máis útiles. É dicir: que non sirvan só para facer e recibir chamadas ou para botalos á parede cando nos alporicemos. Neste senso e grazas a esta firma de Ferrol, agora tamén van servir para que vexamos os encontros da Recopa de Fútbol Sala que se está a celebrar en Santiago (co Lobelle de anfitrión). Segundo informa a empresa galega, trátase dunha aposta innovadora do Campeonato de Europa de Clubes Campeóns de Fútbol Sala e que vai facer posible que entre os días 25 e 28 de xaneiro Loroestudio achegue os partidos da dita competición ós teléfonos dos seareiros.
A aplicación desenvolvida por esta empresa porá a disposición dos usuarios catro seccións temáticas e/ou funcionais nas que se incluirán novas, fotos, titulares salientables e información variada sobre horarios, resultados, clasificacións e equipos. Asemade, os seareiros tamén poderán acceder a enquisas acerca de diversas votacións: mellor xogador, mellor equipo, etc. Os interesados en ter no seu móbil esta aplicación poden consultar como facelo na web do Club Lobelle de Santiago.