Máis servizos de información cidadá por SMS na Coruña

O Concello da Coruña vén de anunciar que vai ampliar os servizos de información cidadá por SMS que ofrece na actualidade, a fin de mellorar o seu servizo público e incrementar a relación informativa entre a administración e a cidadanía coa axuda das TIC .
Segundo informou a concelleira responsable de Persoal, Interior e Informática, Obdulia Taboadela, o servizo ofrece, ata o de agora, dúas posibilidades: as canles públicas, que se refiren ás de tipo temático ás que se poden subscribir os cidadáns e as listaxes privadas de mensaxes, que son as incorporadas polo Concello para informar á cidadanía sobre feitos significativos de “actualidade e servizos da cidade”.
Na actualidade, 10 das 26 áreas de xestión municipal xa empregan este sistema, en áreas como protección civil, cultura, deportes, bombeiros, servizos sociais ou seguridade cidadá.
As novas canles que está a desenvolver o concello da Coruña informarán á cidadanía sobre convocatorias públicas, datas de recadación de taxas ou concesión de axudas, entre outras cousas.
A iniciativa enmárcase na liña de actuación do PEGSI IeCA-LA2, de transparencia e difusión da información e dos materiais públicos.