Malasombra xa é unha realidade

En marzo o grupo de desenvolvedores 4MHz, moi coñecido polas súas creacións para ordenadores Amstrad CPC, ousou iniciar unha campaña de micromecenado para facer realidade o seu novo traballo, Malasombra, un xogo para a clásica consolas NES de Nintendo, para que os amantes do retro puidesen facerse cunha copia dixital ou física do mesmo, ou sexa, que os mecenas podían optar a facer cun cartucho de NES cun xogo desenvolvido en 2025.
O éxito desta iniciativa foi tal que en 7 horas conseguiron completar o seu obxectivo económico, e finalmente conseguiron xuntar 70.400 euros achegados por 1.164 patrocinadores que esta semana están a recibir as súas copias de Malasombra.
Os que non apoiaran a campaña de micromecenado no seu día poden agora acudir á tenda en liña de 4MHz para adquirir o xogo en dixital (con dispoñibilidade inmediata) e en breve ofrecerán tamén copias físicas deste impresionante traballo dun grupo de entusiastas que conseguiron facer realidade o soño de crear videoxogos para unha consola de videoxogos que significa tanto para eles sentimentalmente.
Malasombra é unha aventura bastante tópica, na que un aspirante a mago, Pirou, ve como o malvado bruxo Malasombra secuestra a súa amada o día do seu casamento á vez que transforma en sapo aos convidados á celebración. Nesta situación Pirou precisa xuntar as páxinas dun libro de maxia para adquirir as habilidades que lle permitan derrotar a Malasombra, recuperar a súa amada e reverter os danos ocasionados polo malvado feiticeiro.
Esta aventura de aparencia básica é todo un desafío aos reflexos e a intelixencia dos xogadores, que terán que superar numerosos retos, resolver quebracabezas, atopar camiños ocultos e dominar habilidades máxicas como transformarse en ra, esquío ou ganso para chegar a onde non sería posible con forma humana. Cómpre tamén salientar que non estamos ante unha experiencia curta, pois incluso estando afeitos a este tipo de xogos, completar a aventura pode levarnos entre 5 e 7 horas, o que de seguro que resultará gratificante para os nostálxicos da vella consola de Nintendo.