Medran os lectores ao abeiro da plataforma GaliciaLe

Os días pasados, na Biblioteca e Arquivo de Galicia e presidida polo director xeral de Políticas Culturais, Anxo Lorenzo, celebrouse a xuntanza do Consello de Cooperación Bibliotecaria. Na reunión desenvolvida en Santiago constatouse un importante crecemento do número de persoas que tiran proveito das ferramentas TIC da Rede de Bibliotecas Públicas de Galicia (Consellería de Cultura e Turismo). Máis polo miúdo a plataforma GaliciaLe.
Entre os puntos cruciais do día figuraba a presentación da memoria anual da Rede de Bibliotecas Públicas de Galicia, na que se deu conta dos novos rexistros e incorporacións á mesma: a de Beariz, a de Antón de Pepiño de Curtis e a de Barreiros.
Outro dos puntos principais foi o impulso ao programa de dinamización da lectura Ler Conta Moito, que contará este ano cun orzamento de 345.000 euros, 150.000 máis que no exercicio anterior. Ademais, fíxose saber que as coleccións das bibliotecas públicas recibiron en 2018 a incorporación de 13.700 exemplares de novidades en galego, correspondentes a 426 títulos.
Como dixemos, tamén houbo novidades relativas á plataforma para o préstamo de libro electrónico nas bibliotecas, a plataforma GaliciaLe. Segundo se fixo saber, trátase dun servizo “cada vez máis consolidado entre as usuarias e usuarios das nosas bibliotecas, e proba diso é o medre no número de préstamos”. O informe presentado no Consello de Cooperación Bibliotecaria sinala que en 2018 houbo un 46% máis de lectores no catálogo de galego e un 67% máis no de castelán. No Consello explicouse que entre as razóns deste incremento figuran o fortalecemento da colección dos dous catálogos, que teñen máis títulos, licenzas e formatos. A isto cómpre engadir as accións de difusión levadas a cabo pola Consellería de Cultura e Turismo, baixo o lema A biblioteca vai contigo, e polo Ministerio de Cultura e Deporte.