#NeThinking volverá a reflexionar sobre comunicación e contidos dixitais na Illa de San Simón

Como xa avanzamos hai tres semanas, os vindeiros días 25 e 26 de abril desenvolverase unha nova edición de #NeThinking, encontro na Illa de San Simón que poderá seguirse remotamente a través de streaming e de redes sociais, e no que comunicadores e expertos na Internet debaterán sobre os novos medios, hábitos e modelos de consumo de contidos dixitais.
O conselleiro de Cultura, Educación e Ordenación Universitaria, Xesús Vázquez, foi o encargado de presentar onte a cuarta edición de #NeThinking, destacando que con esta actividade “preténdese crear un marco de reflexión sobre os desafíos que as novas tecnoloxías supoñen para conceptos tradicionais relacionados coa cultura, co proceso ensino-aprendizaxe, coa linguaxe ou co formato dos medios de comunicación”.
Entre os participantes en #NeThinking destacan o publicista e comunicador Risto Mejide; o director xeral da Fundación del Español Urgente, Fundeu, Joaquín Müller; e os profesores Miguel Ángel López Hematocrítico e Joaquín Rodríguez. Compartirán as súas impresións con expertos como Ismael El-Qudsi, Mario Tascón ou Javier Celaya, xornalistas e creadores como Raquel Martos ou Julián Hernández e expertos en medios dixitais como Marilín Gonzalo ou Eduardo Arcos.
A inauguración oficial do encontro terá lugar o venres ás 16:30 horas, celebrándose nesa xornada un par de mesas redondas que abordarán os Novos Medios de Comunicación (analizando as novas tendencias nos medios en liña) e o enfrontamento Creador vs Usuario (achegándose aos dereitos do creador e do usuario e á Lei de Propiedade Intelectual).
A xornada do sábado comezará ás 10:00 horas cun debate sobre Creatividade e Contidos no que participarán Risto Mejide e Miguel Ángel López Hematocrítico, contando con Marilín Gonzalo como moderadora. A esta conversa seguiraa outra sobre Educación Dixital, que pechará a sesión matinal. Durante a tarde Eduardo Arcos e Risto Mejide discutirán sobre Emprender na Internet e, como última mesa de debate, teremos aos galegos Javier Pedreira Wicho e Julián Hernández Falando do Futuro.
A todas estas conversas seguiralles unha lectura de conclusións da man de Raquel Martos, xornalista e guionista que xa participou en anteriores edicións de #NeThinking.