Nintendo adianta boa parte do calendario de lanzamentos para Nintendo Switch

mércores, 14 de xuño do 2017 Marcus Fernández

Un ano máis Nintendo non fai unha conferencia en si mesmo durante o E3, senón que anuncia as súas novidades en forma de vídeo, reservando o espazo na feira para que os asistentes poidan vivir experiencias de primeira man. Este ano resultaba especialmente interesante, por ser o primeiro no que a Nintendo Switch está no mercado, e a compañía xaponesa non decepcionou presentando numeroso material que poderemos degustar nos vindeiros meses e entre os que non faltaron pequenas sorpresas.


Por unha banda temos un novo tráiler de Super Mario Odyssey, aventura en 3D de mundo aberto protagonizada por Mario, que volve así a un xénero que tiña abandonado dende hai 15 anos, e que incluso contou cunha versión de demostración en Los Ángeles, de xeito que os comentarios sobre este título non se fixeron esperar e parece que será o grande xogo para Nintendo Switch da campaña de Nadal, confirmándose que o 27 de outubro chegará ás tendas acompañado por tres figuras amiibo (Mario, a Princesa Peach e Bowser vestidos de voda).
O xogo convidaranos a visitar distintos reinos en 3D nos que recoller lúas que servirán de combustible para a aeronave de Mario, a Odyssey. Deste xeito percorreremos contornos nos que interactuar de xeitos moi diversos, poderemos vestir diferentes indumentarias e incluso contaremos con Cappy, un novo compañeiro que outorgará novos movementos. Un título francamente prometedor que demostrará a solvencia da Nintendo Switch como consola para grandes xogos e non só como unha Wii U con posibilidades portátiles.
A Nintendo Switch tamén contará con xogos como Mario + Rabbids Kingdom Battle (título anunciado por Ubisoft estes días), Pokkén Tournament DX (versión dun xogo de loita de Wii U que estará dispoñible o 22 de setembro) e EA Sports FIFA 18 (xogo de fútbol que verá a luz o 29 de setembro), que xa teñen datas de lanzamento fixadas, mentres que outros xogos como Xenoblade Chronicles 2, Rocket League e The Elder Scrolls V: Skyrim chegarán ao longo do inverno, Fire Emblem Warriors no outono e o novos xogos de Yoshi e Kirby chegarán durante 2018.
Os seareiros de Samus Aran tamén teñen boas novas, xa que adiantouse que Metroid II: Return of Samus, clásico de Game Boy lanzado en 1992, contará cunha versión para Nintendo 3DS titulada Metroid: Samus Returns, aínda que a grande sorpresa para moitos foi saber que estaba en preparación para Nintendo Switch Metroid Prime 4, xogo do que só se coñece o logotipo.
De Metroid: Samus Returns cómpre salientar que este xogo é froito da colaboración de Nintendo cun dos estudos españois máis reputados, MercurySteam. O xogo verá a luz o 15 de setembro, e inicialmente recompensarase aos compradores cun código de descarga para facerse co xogo orixinal de Game Boy na Nintendo eShop.
Sobre títulos xa lanzados, anunciouse que The Legend of Zelda: Breath of the Wild contará cun par de paquetes con contido descargable que poderán mercarse de xeito conxunto por 19,99 euros e que chegarán o 30 de xuño e durante o vindeiro inverno respectivamente.

JPEG - 103.5 KB
O vindeiro día 30 sairá o primeiro DLC para The Legend of Zelda: Breath of the Wild

PUBLICIDADE