Nokia leva a radio por Internet ó móbil

Os usuarios de terminais Nokia N82, N91 e N95 poden xa descargar de balde a aplicación Nokia Internet Radio (que virá incluída nos novos dispositivos coa 3ª edición da plataforma S60) que lles permitirá descubrir e escoitar emisoras de radio que emiten pola Internet.
Esta nova aplicación permite descubrir centos de radios de todo o mundo organizadas por xénero, país e lingua que se poden engadir tamén a unha listaxe de favoritos para facer máis doado o seu acceso ulterior.
O encargado da división de música de Nokia, Tommi Mustonen, entende que esta ferramenta é moi útil xa que «a meirande parte da descuberta de nova música acontece mentres escoitas a radio» polo que levar esta experiencia ó móbil a fai máis accesible e «dá á xente novos xeitos de atopar música».