Nova investigación europea pola creación de imaxes sexualizadas por parte de Grok

A Comisión de Protección de Datos de Irlanda (Data Protection Commission, DPC) anunciou a apertura dunha investigación formal contra X Internet Unlimited Company (XIUC), a entidade responsable da plataforma X na Unión Europea, ao abeiro da sección 110 da Lei de Protección de Datos de 2018.
A actuación céntrase na aparente creación e difusión, a través da rede social, de imaxes íntimas e/ou sexualizadas potencialmente daniñas e non consentidas, xeradas mediante ferramentas de intelixencia artificial asociadas ao modelo lingüístico Grok integrado en X, como tamén está a investigar a Comisión Europea. Segundo a DPC, estas imaxes poderían implicar o tratamento de datos persoais de usuarios da UE e do Espazo Económico Europeo (EEE), incluíndo menores de idade.
A decisión de iniciar a investigación foi comunicada á compañía o luns 16 de febreiro. O obxectivo do procedemento é determinar se XIUC cumpriu coas súas obrigas establecidas no Regulamento Xeral de Protección de Datos (RXPD), en particular no relativo aos principios de tratamento de datos (artigo 5), á licitude do tratamento (artigo 6), á protección de datos desde o deseño e por defecto (artigo 25) e á esixencia de realizar unha avaliación de impacto en materia de protección de datos (artigo 35).
No anuncio da apertura da investigación, o subcomisario Graham Doyle explicou: «A DPC leva en contacto con XIUC desde que hai varias semanas xurdiron informacións nos medios sobre a suposta capacidade de usuarios de X para solicitar á conta @Grok na plataforma a xeración de imaxes sexualizadas de persoas reais, incluídos menores. Como autoridade de supervisión principal para XIUC na UE e no EEE, a DPC iniciou unha investigación a grande escala que examinará o cumprimento por parte da compañía dalgunhas das súas obrigas fundamentais ao abeiro do RXPD en relación cos feitos investigados».
A DPC actúa como autoridade principal de supervisión de X na UE, polo que as conclusións deste procedemento poderían ter impacto en todo o mercado comunitario.