O BNG pide que se regulen os teléfonos 905 para protexer aos consumidores

Xosé Manuel Pérez Bouza, senador do BNG, presentou unha iniciativa na que demanda ao Goberno que regule a utilización dos prefixos telefónicos 905 «para protexer aos consumidores evitando situacións abusivas e fraudulentas» que se fan en moitas ocasións en concursos de televisións locais, autonómicas e estatais.
Pérez Bouza lembra que os servizos do prefixo 905 «son un auténtico negocio tanto para as operadoras de telefonía como para as canles de televisión, xa que unha parte do prezo corresponde ao operador, e a outra págase pola participación no concurso, producíndose de feito unha tarificación adicional», lembrando tamén que o prezo destas chamadas é de 1,20 euros/minuto de media.
O Goberno prometeu hai máis dun ano que os teléfonos 905 se incluirían nos prefixos de tarificación adicional para mellorar a protección dos consumidores pero o senador do BNG incidiu no feito de que «a día de hoxe a promesa non se cumpriu e atopámonos con que os servizos prestados a través deste prefixo, ao non estar considerados de tarificación adicional –a pesar de selo na práctica– seguen sen estar obrigados a cumprir co Código de Conduta que rexe as prestacións destes servizos».
Actualmente os números con prefixos 803, 806 e 807 están regulados, e deben informar do prezo da chamada e procurar non alongar a súa duración, o que debería trasladarse aos números 905 por ser na práctica equivalentes aos anteriores.