O Campus de Lugo acolle un curso de Introdución a Ubuntu-USC
xoves, 8 de abril do 2010
A Aula Universia da Biblioteca
Intercentros do Campus de Lugo está a acoller, durante estes días 7, 8 e 9 de
abril, un curso sobre Introdución á Ubuntu-USC, que
imparte a Oficina de Software Libre da USC no marco do Programa de Formación e
Innovación Docente (PFID) da USC.
O curso, que tén como principal
obxectivo facer que as persoas asistentes empreguen o sistema operativo
GNU/Linux Ubuntu-USC en lugar de Windows, versa sobre o proceso de instalación,
configuración e manexo deste sistema operativo libre, que permite, ao igual que
outros similares, comprimir cartafois e instalar e desinstalar programas, entre
outras cousas.
Segundo informan dende a propia
Oficina de Software Libre da USC, a metodoloxía do curso está a ser “eminentemente práctica” e, da man dun
profesor, as persoas asistentes aprenden a moverse polo contorno da Ubuntu-USC,
detectando as alternativas existentes para desenvolver as súas tarefas diarias
e buscándolle novas utilidades a un programa que poden adaptar ás súas
necesidades.
O alumnado tamén terá a
oportunidade de comparar este sistema operativo con outros programas similares
tanto privativos como libres, para comprobar, de primeira man, que non existen
tantas diferenzas entre o Ubuntu-USC e os que usan habitualmente, e que incluso
pode chegar a ser moito máis sinxelo e doado de usar que os SO que xa coñecían.
Para este curso, no que as persoas
asistentes recibirán información sobre boas prácticas para quitarlle o máximo
partido á informática, emprégase o software VirtualBox de Sun Microsystems,
unha potente máquina virtual baseada tamén en software libre.
O temario
completo do curso, que pode verse dentro do PFID, é o que segue:
1. Instalación.
2. Contorno de escritorio.
3. Aplicativos de uso xeral: Firefox. Evolution. Rythmbox. Empathy. Totem / VLC.
4. Instalación e eliminación de paquetes de software.
5. Cando o software libre non é dabondo: Aplicativos privativos. Códecs. Controladores de dispositivo.
6. The GNU/Linux way. A comunidade e a axuda entre usuarios.
7. Breve introdución a outros aplicativos. Ofimática, vídeo, deseño e maquetación, xogos, VOIP e Videoconferencia.