O IES Chan do Monte de Marín estrea acceso á Rede de 40 Mbps

O Instituto de Ensino Secundario Chan do Monte de Marín conta desde hoxe con conexión a Internet de 40 Mbps de velocidade. Con este centro a provincia de Pontevedra conta xa con 55 dos 217 centros educativos aos que xa se lles facilitou o acceso a esta tecnoloxía no último ano, grazas ao Plan de Banda Larga da Xunta, que está a desenvolver a Axencia para a Modernización Tecnolóxica de Galicia.
A mellora da conectividade no IES Chan do Monte de Marín, que estaba prevista nas actuacións do Plan, tivo que aprazarse en varias ocasións, xa os espazos nos que o operador de telecomunicacións tivo que realizar as obras para a canalización da fibra óptica requiriron informes de diferentes departamentos municipais e autonómicos para a súa aprobación.
No centro cursan estudos máis de 600 alumnos, entre eles alumnos de varios ciclos superiores da familia de informática. O centro dispón de mais de 230 ordenadores.
A implantación de redes de altas prestacións permite ao alumnado ter un acceso máis efectivo á Rede, sen esperas ou contratempos; conectarse simultaneamente un maior número de usuarios e o funcionamento de máis aplicacións informáticas cun tempo de resposta adecuado.
A mellora da conectividade dos centros educativos é posible grazas á posta en marcha pola Xunta do Plan de Banda Larga de Galicia, que contempla entre as súas actuacións, e en colaboración co operador R, a extensión destas redes de nova xeración (NGA) coas velocidades máis punteiras.