O Instituto Tecnolóxico de Galicia e o ITER darán forma a unha plataforma IA de xestión enerxética

O centro tecnolóxico ITG (Instituto Tecnolóxico de Galicia) e o Instituto Tecnolóxico e de Enerxías Renovables (ITER), entidade pública dependente do Cabildo de Tenerife, asinaron un acordo de colaboración para o desenvolvemento conxunto dunha plataforma intelixente destinada á xestión enerxética e a operación técnica de sistemas híbridos de enerxía.
Este convenio permitirá a ambas as institucións unir as súas capacidades en intelixencia artificial (IA), monitoraxe avanzada, enerxías renovables e despregadura de infraestruturas enerxéticas para acelerar a dixitalización do sector e avanzar cara a modelos máis eficientes e sostibles.
A nova plataforma estará orientada á integración e xestión optimizada de recursos enerxéticos (incluíndo xeración renovable, almacenamento e cargas flexibles) mediante algoritmos de IA, xemelgos dixitais e ferramentas avanzadas de control. O
seu desenvolvemento aproveitará as instalacións experimentais, laboratorios enerxéticos e redes de microrredes que tanto o ITER como ITG teñen operativas en Tenerife e Galicia.
O conselleiro insular de Innovación, Investigación e Desenvolvemento, Juan José Martínez, destacou que este acordo “reforza o papel do ITER como motor tecnolóxico do Cabildo e como un dos centros máis avanzados do país en integración renovable. A alianza con ITG permítenos sumar talento e capacidades para acelerar a transición enerxética e posicionar a Tenerife na vangarda da innovación aplicada ao sistema eléctrico”.
Martínez engadiu ademais que “a dixitalización e a IA serán claves para garantir redes máis eficientes, seguras e respectuosas co medio, e esta colaboración contribúe directamente a ese obxectivo”.
Pola súa banda, o director da División de Enerxía de ITG, Santiago Rodríguez Charlón, destacou que “o acordo crea un marco estable de cooperación e bríndanos un escenario excepcional para validar modelos e adestrar algoritmos en contornas experimentais de primeiro nivel". O reto que enfrontan ambas as entidades, engadiu, é "transformar coñecemento en solucións concretas para empresas, administracións e operadores enerxéticos". Favorecer, en definitiva, "a integración de máis renovables, xestionar mellor a demanda e despregar solucións flexibles que fagan o sistema enerxético máis resiliente”.
ITG, recoñecido oficialmente como Centro Tecnolóxico Nacional e acreditado como Centro de Excelencia Cervera polo CDTI, achega ao acordo décadas de experiencia en plataformas IoT, xestión enerxética avanzada, IA e experimentación en microrredes e sistemas híbridos.
“O noso laboratorio de enerxía intelixente situado na Coruña constitúe unha das infraestruturas tecnolóxicas máis completas de España para a transición enerxética”, salientou o ITG.
Pola súa banda, o ITER contribúe coa súa ampla traxectoria no deseño, operación e monitoraxe de instalacións renovables, a súa rede eléctrica propia en Granadilla de Abona e a súa infraestrutura de supercomputación e análise de datos, fundamentais para adestrar e validar modelos enerxéticos avanzados.