O Sistema Miasoft do CITIC, a solución para o complicado diagnóstico da síndrome da apnea do sono

Vicente Moret, investigador do CITIC responsable de Miasoft

Fatiga permanente, estrés crónico, patoloxías cardíacas, somnolencia diúrna. Estes son algúns dos síntomas e/ou problemas que pode implicar a síndrome de apnea do sono, unha doenza que en España afecta a aproximadamente 3 millóns de persoas e que pode ocasionar a morte. Pola súa natureza e características, esta síndrome é dificilmente diagnosticable polo paciente ao manifestarse no proceso do sono, algo no que as investigacións do CITIC están traballando para darlle solución. Neste contexto, a creación de Miasoft por integrantes do Laboratorio de Investigación e Desenvolvemento en Intelixencia Artificial (LIDIA) do CITIC, é o último desenvolvemento, e está listo para a súa comercialización inmediata.
Miasoft é un sistema de monitorización intelixente da síndrome de apnea do sono resultado de máis de quince anos de investigación en Intelixencia Artificial que analiza os sinais monitorizados en pacientes sometidos á polisomnografía nocturna, tanto relacionadas coa función respiratoria do paciente, como co sono do paciente.
O sistema Miasoft identifica episodios apneicos durante o sono, clasificándoos en obstrutivos, centrais ou mixtos, e establecendo un diagnóstico global da síndrome no contexto do hipnograma do paciente. Durante estes episodios e segundo o tipo de apnea, a persoa afectada ou sofre unha oclusión das vías respiratorias, ou “esquécese de respirar”, o que provoca unha diminución do osíxeno en sangue. Cando este nivel descende a un 95%, dispáranse todas as alarmas e o individuo responde fisioloxicamente e de formas distintas á hipoxemia asociada.
Entre as vantaxes que presenta Miasoft atópase a súa total adaptabilidade, xa que se trata dun sistema 100% configurable, desde o principio ata o final. En total, Miasoft inclúe 12 canles de monitorización máis o contexto da análise. Para o desenvolvemento do seu software empregáronse diferentes tecnoloxías de lóxica difusa, redes de neuronas e recoñecemento de patróns.
Listo para a súa explotación comercial
Segundo Vicente Moret, Investigador do CITIC responsable de Miasoft, “este sistema está listo para a súa explotación comercial. Realizamos análises exhaustivas próximas aos 15.000 minutos en eventos de difícil clasificación para validar o sistema de xeito meticuloso e con absoluto rigor, contrastando as súas análises coas dos expertos médicos e obtendo uns resultados extraordinarios”.
Na actualidade a versión 1 de Miasoft está rexistrada e segue uns criterios de uso e ergonomía que permiten que sexa empregada en calquera unidade de sono. “Estamos a traballar na versión 2 de Miasoft, que implica un traballo máis complexo có reto da portabilidade, xa que o noso obxectivo é achegar a medicina ao paciente, podendo desprazar Miasoft ao seu domicilio mediante unha aplicación que leve daquela os datos -vía telemática, por exemplo- ata unha unidade centralizada de análise”, engade Vicente Moret.
Ademais das vantaxes médicas de Miasoft, hai outros beneficios asociados ao sistema entre os que se atopa a súa capacidade formativa: a información facilitada por Miasoft é tan concreta que permite mostrar aos estudantes a que se deben os diferentes eventos que recolle o sistema dun xeito sinxelo e cun alto grado de fiabilidade. Incluso o aforro de custos e tempo é outra das melloras que fornece: normalmente, tras unha polisomnografía un especialista do sono ten que dedicar en torno a unhas catro horas a analizar os rexistros, mentres que con Miasoft simplifícase o diagnóstico e en tan só uns minutos realízase unha proposta do mesmo.
Segundo apuntan dende o CITIC, con Miasoft non só se melloran os recursos hospitalarios, tamén se obtén un diagnóstico máis rápido e rigoroso do diagnóstico da síndrome de apnea do sono que afecta aproximadamente ao 85% dos pacientes que sofren algún tipo de trastorno do sono e, posiblemente, unha das máis complicadas de diagnosticar.