O catálogo de Xbox Game Pass incluirá novidades

O Xbox Game Pass é un servizo de subscrición para Xbox One que permite a subscrición por 9,99 euros/mes a un completo catálogo de máis dun cento de xogos no que poderiamos considerar un Netflix dos videoxogos, e aínda que normalmente os títulos incluídos dentro desta subscrición son de fondo de catálogo, iso vai mudar, xa que a priori todos os lanzamentos exclusivos para Xbox One de Microsoft Studios pasarán a estar tamén dispoñible en Xbox Game Pass, comezando por Sea of Thieves, xogo que verá a luz o 20 de marzo.
Aparte do mencionado xogo, tamén entrarán no servizo de subscrición State of Decay 2 e Crackdown 3, así como outros títulos de Microsoft Studios por anunciar e, como non, as futuras edicións das franquías Halo, Forza e Gears of War. Estas incorporacións serán no propio día de lanzamento oficial dos xogos, o que fai que para moitos seareiros da consola de Microsoft este servizo sexa moi rendible economicamente.
Cómpre lembrar que, aínda que o catálogo de xogos de Xbox Game Pass é rotativo (como tamén acontece nas plataformas de vídeo baixo demanda, nas que a oferta dispoñible vai renovándose pouco a pouco), tamén inclúe importantes rebaixas na compra dos xogos no seu catálogo, porque se algún xogador quere incorporalos para sempre á súa colección.