O sobrecusto polo roaming na U.E. podería rematar o ano que vén

A Comisión de Industria da Eurocámara aprobou onte o paquete lexislativo para prohibir o recargo tarifario polo uso do móbil en itinerancia (roaming) dentro da Unión Europea, tanto para chamadas e mensaxes de texto como para o uso de datos en mobilidade, fixando como data para rematar con esta práctica o 15 de decembro de 2015. Dentro do paquete de medidas tamén figuraría que os operadores de telecomunicacións non poderán bloquear ou ralentizar servizos como Skype ou WhatsApp.
As compañías de telecomunicacións téñense manifestado en contra deste tipo de medidas, por considerar que minguan considerablemente os seus ingresos, coa consecuente redución de investimento nas súas infraestruturas, aínda que dende a Comisión Europea consideran que estamos ante un concepto artificial que non responde a unha realidade técnica e supón un importante prexuízo para os cidadáns europeos ao moverse polo territorio da Unión.
Este paquete lexislativo votarase os días 2 e 3 de abril, a poucas semanas da renovación do Parlamento Europeo, polo que estas normas aínda poderían mudar nos vindeiros meses.