Os consumidores galegos advirten dunha caída na calidade de produto das operadoras

En España a cuestión das telecomunicacións de cara ao consumidor é coma unha ración dupla de malas novas. Por unha banda, danse os prezos máis altos da Unión Europea, e pola outra que ninguén crea que isto aseguraría un mellor e máis eficaz servizo. Todo o contrario. Así nolo recordan as plataformas de consumidores de Andalucía e Galicia, que veñen de advertir dunha importante caída na calidade dos paquetes e solucións que achegan as operadoras. Dito doutra maneira: se a oferta que se pon ao noso alcance de conexións ás redes fose un can, viría chega de pulgas. Os datos que se achegan (aquí en pdf), tirados das informacións que as compañías están obrigadas a subministrar ao Goberno, amosan que Movistar segue en cabeza, percibíndose segundo o estudo certa baixada de Vodafone e R no que a calidade dos seus fornecementos se refire. O mesmo se pode dicir de Euskaltel, malia que dun xeito máis leve.

Segundo informa Galicia Hoxe facéndose eco destas informacións, en prezos rexistran subas de R (21%) e Telecable (4%), ascensos de prezos que en relación á situación actual de crise non teñen moito sentido, sinalan os consumidores, e máis se temos en conta que este proceso non trae parello unha mellora nos servizos. En termos concretos, a Unión de Consumidores de Galicia (UCGAL) sinala que “os mil minutos (sen incluír no cómputo descontos e promocións) máis caros son os da operadora galega R, que chegan aos 100 euros, o que representa un 21% en relación a 2009”. Logo virían Orange con 80 euros e Euskaltel con 70.

A reacción da empresa con sede na Coruña con respecto a estes informes chegou decontado. “Dende R queremos sinalar que os datos que veñen reflectidos no estudo son incorrectos como se pode comprobar nos diferentes informes que publicou a propia Secretaría de Estado de Telecomunicacións durante o 2009", no que se refire á calidade. Asemade, a operadora galega confesa non comprender a que se refire a Unión de Consumidores cando sinala que os prezos máis básicos, os 1.000 minutos devanditos, sexan os máis caros. E explican: “Os nosos clientes teñen incorporados nos seus combos tódalas chamadas a fixos nacionais (limítase cada chamada a 120 minutos, pero pódese colgar e chamar cantas veces se queira) ademais de 300 minutos de chamadas a móbiles de R; é dicir, que os nosos clientes non teñen que pagar por chamar, agás que se trate de números de tarificación adicional, números internacionais ou outros móbiles, pero no estudo tampouco se especifica a onde son estas chamadas".