Os usuarios de R quedan sen conexión á Internet durante 4 horas da pasada noite

Como xa pasara o pasado outono, os usuarios de R padeceron a pasada noite unha caída xeral do servizo de Internet durante preto de 4 horas, o que non só tivo consecuencias para os clientes domésticos, senón que medios de comunicación coma El Correo Gallego, El Progreso, El Ideal Gallego e Xornal de Galicia deixaron de ter operativa a súa páxina web por este problema de conectividade.
Aínda que as incidencias son difíciles de evitar, cómpre informar axeitadamente aos usuarios das mesmas, e neso a operadora galega de cable demostrou ser incapaz de responder axeitadamente unha vez máis, pois ao chamar ao seu servizo de atención ao cliente, e tras permanecer varios minutos en espera, a meirande parte das chamadas non eran atendidas e remitían aos usuarios á páxina web da compañía, onde aínda hoxe non se publicou nada sobre a incidencia.
Incluso ao blog oficial de R chegaron comentarios coma o dun usuario chamado banzai, e que reproducimos aquí porque parece que foi vetado tardou en ser aprobado polo administrador do blog (entendemos que por estar fóra da temática da entrada na que se fixo por acontecer os feitos nun día festivo): «No tiene que ver con el tema, pero si con R. Me esta gustando mucho lo bien que estan tratando este corte que lleva ya casi 2 horas... queda de maravilla de cara la galeria pagar 110€ religiosamente cada mes y cuando hay un corte (supongo que general aunque puede ser de mi zona, pero tal y como esta atencion al cliente supongo que es general...) R tenga la jeta de colgar el telefono y no decir ni pio (ya que la red propia de R funciona... como minimo lo logico es poner un comunicado en la pagina de mundo-r ya que pasais de informar por el servicio de atencion al cliente) en fin, tan pronto se me acabe el contrato de la promocion o mucho cambian las cosas o me ire de esta empresa que tener mejor oferta es bastante sencillo (tv de pago por satelite, adsl y sobra dinero todavia..)», ao que un tal makeijan engadiu «Que curioso! A esta hora só se pode entrar nas páxinas de R :-(».
Agardemos que poñan medidas para evitar este tipo de cortes no futuro e, de non poder facelo, que cando menos atendan aos seus clientes como merecen.

ACTUALIZACIÓN: No blog de R piden desculpas polo corte e mencionan que están a traballar na creación dun espazo na web do operador de cable para advertir aos seus usuarios das incidencias.