Os usuarios móbiles de Ono gozarán de 4G a partires do 16 de abril

Cando Vodafone pechou a compra do Grupo Corporativo Ono anunciou que os usuarios da compañía resultante poderían gozar das conexións de fibra óptica de Ono e do 4G de Vodafone, e parece quedar menos para que esta última promesa se concrete, xa que dende Neeo.es dan conta de que Ono, que actualmente está a migrar aos seus usuarios móbiles da rede de Movistar á de Vodafone, comezará a ofrecer aos seus usuarios o acceso á rede 4G de Vodafone o 16 de abril, converténdose no primeiro Operador Móbil Virtual (OMV) de Vodafone en gozar destas redes de maior capacidade e menor latencia.
A data do 16 de abril non sería aleatoria, senón que correspondería exactamente ao día seguindo da data na que pretenden completar a migración dos seus usuarios de Movistar a Vodafone, para o que é preciso un cambio de tarxeta SIM.
Espérase que estes cambios favorezan que Vodafone poida lanzar unha nova oferta de servizos converxentes que poidan facer fronte a Movistar, que está a conseguindo paliar a fuga de usuarios grazas á súa aposta pola fibra óptica; aínda que tamén resultará interesante ver como afectará aos OMV de Movistar o feito de que os usuarios de Ono vaian gozar de 4G, pois resulta evidente que o operador non poderá negarse a ofrecer tal servizo ao resto de compañías que o demanden.