Os viaxeiros-escritores galegos documentan o mundo no blog colectivo Equipaxe de Man
xoves, 23 de maio do 2013
O eido informativo na nosa lingua, ligado á Rede,
segue a reforzarse este ano con novas temáticas e obxectivos. Entre os
responsábeis disto atopamos a xente como os responsábeis da posta
en marcha da canle Equipaxe
de Man, medio na nosa lingua especializado en viaxes por todo
o mundo, cunha óptica do máis interesante (non deixando nada por
descubrir, non desprezando países nin lugares fóra das rutas
convencionais que impoñen as axencias de viaxes, reivindicando tamén
o noso, achegando alternativas ao turismo cego e disfuncional de
resorts e complexos de luxo). A canle, por certo, é unha das
finalistas (categoría Blog Turístico) da segunda edición
dos
premios MexilOnseTuits, que se entregan o vindeiro 2 de xuño en
Bueu.
A páxina, un blog colectivo onde se dá acubillo a
diferentes camiñantes da nosa terra que contan aquí as súas
andainas polo mundo adiante, é moito máis “que unha maleta con
roupa para dous días, un neceser e unha cámara de fotos”. Ou
sexa, que o nome de Equipaxe de man é un xeito de convidarnos
a ver o inmaterial que está detrás das cousas. Por exemplo: relatos
de viaxes, experiencias, suxestións, plans de futuro, compromiso coa
terra (e coa Terra), texto, imaxes, vídeos, etc. As normas desta
nova canle colectiva (na que xa podemos ver as achegas de xente como
Javimos,
Adriana, Ana,
David, Keruac,
Lorena, Mar,
Tania, Tugui,
Ubi ou Vicky)
son algo así como unhas antinormas: que cada quen escriba o
que lle pete e, sobre todo, dende o máis guste de facelo.