PlayStation Plus ofrecerá o xogo de Mad Max en abril

Tras un mes de marzo no que PlayStation Plus tivo unha das seleccións de xogos máis completa que fixo nunca, parece que Sony solta o pé do acelerador, e ofrece unha selección para o mes de abril que, pese a ser moi sólida no que a xogos de PS4 se refire, parece marcar unha pauta n ocaso dos títulos de PS3 e PS Vita, que son totalmente irrelevantes, con títulos como In Space We Brawl (PS3), Toy Home (PS3), 99 VIDAS (PS Vita) e Q*Bert Rebooted (PS3/PS4/PS Vita) aos que tamén se une Motor Strike: Immortar Legends do programa PlayStation Talents.
Por fortuna, os xogos para PlayStation 4 conseguen eclipsar a mala selección para as consolas en vías de abandono por parte de Sony, comezando por Mad Max, xogo que sen ser unha adaptación do recente filme do mesmo título, consegue trasladar boa parte da esencia da produción de George Miller, con grandes combates corpo a corpo e en vehículos a través do Páramo, onde haberá que superar complicadas misións mentres se explora o territorio para xuntar recursos para construír un vehículo de combate cada vez máis completo.
O outro xogo entra dentro do xénero da condución máis clásica, pois non é outro que Trackmania Turbo, o arcade de carreiras de Ubisoft, no que a velocidade manda e que permitirá escoller entre 4 escenarios con máis de 200 circuítos e coa posibilidade de gozar de partidas con ata 16 xogadores. Tamén será posible tirar proveito do Trackbuilder para deseñar as nosas propias pistas.