R permite levar o teléfono fixo no PC ou no móbil

Imaxe do último anuncio do servizo de telefonía móbil de R

A integración de servizos de telefonía do operador galego R ten amosado o seu potencial na empresa, pero agora tamén quere levar algunhas das súas vantaxes profesionais ao usuario particular, e anuncian que os seus clientes domésticos xa poden levar o seu teléfono fixo no ordenador, no iPhone ou nun móbil Android valéndose de conexións Wi-Fi cando non estean no seu fogar facendo uso da tecnoloxía de VoIP e podendo aproveitar así a súa tarifa plana de chamadas a fixos nacionais ou as chamadas de balde a móbil que inclúa a súa tarifa contratada. Este servizo resulta especialmente atractivo no caso de usuarios que viaxen fóra de España, pois poderán aproveitar unha conexión á Rede para facer chamadas telefónicas coma se estivesen na súa casa.
No caso de querer acceder ao número telefónico dende o PC o proceso é sumamente doado, pois chega con visitar dende o mesmo a páxina teléfono web R (ou instalar unha aplicación dispoñible na mesma páxina web), mentres que dende smartphones é preciso instalar unha aplicación compatible, recomendándose dende R a solución de VoIP Bria, dispoñible tanto para iPhone como para Android (de pagamento en ambos casos), recomendándose o seu uso con conexións Wi-Fi para poder empregar o servizo de voz coa debida calidade.
O nome comercial deste servizo é fixo no PC e ten un custo mensual de 2 euros + IVE, o que claramente compensará a quen realice habitualmente chamadas a teléfonos fixos en mobilidade, queira aproveitar os seus minutos de chamadas a móbiles de balde dende fóra do fogar ou viaxe ao estranxeiro. Amais, o servizo non ten compromiso de permanencia, polo que pode contratarse cando se desexe (por exemplo, antes saír de vacacións ou dunha viaxe) para poder aproveitalo só cando sexa preciso.