Ricardo Cao, catedrático da UDC, Premio Nacional de Estatística 2023
luns, 30 de outubro do 2023
O
Instituto Nacional de Estatística (INE) vén de anunciar a
concesión do Premio Nacional de Estatística 2023 ao catedrático da
Universidade da Coruña e investigador do Centro de Investigación
TIC (CITIC) da UDC Ricardo Cao Abad. O Premio Nacional de
Estatística está dotado con 30.000 euros. Ten como finalidade
“recoñecer as contribucións e o labor científico no eido da
estatística”, manifestada por medio da traxectoria profesional dos
candidatos ou como recoñecemento a unha obra singular.
O
xurado estivo presidido por Elena Manzanera Díaz, presidenta do INE,
e integrado por Carlos Ballano Fernández, Alfredo Cristóbal
Cristóbal, Antonio Argüeso Jiménez, María Durbán Reguera, María
Ángeles Gil Álvarez, Dolores Ugarte Martínez, Alicia Nieto Ramos,
José María Sarabia Alegría e Enrique Castillo Ron. En calidade de
secretario actuou Miguel Ángel de Castro Puente.
Ricardo
Cao
Ricardo
Cao é catedrático de Universidade do departamento de Matemáticas,
da área de Estatística e investigación operativa. Coordina o Grupo
de investigación Modelización, Optimización e Inferencia
Estatística. É profesor de Estatística e Investigación de
Operacións da Universidade da Coruña desde 1991. As súas liñas de
investigación abranguen a estatística non paramétrica, o
bootstrap, a análise de supervivencia, a análise de datos
funcionais, a análise estatística de datos de gran volume (Big
Data), a análise de datos dependentes, a
verosimilitude empírica e o modelado estatístico en ciencias dos
materiais, en risco de crédito, en xenómica, e neurociencia e en
malherboloxía.
Na
actualidade é editor asociado das revistas TEST e
Computational Statistics. Anteriormente foi editor xefe das
revistas TEST, Computational Statistics e Journal of
Nonparametric Statistics. A súa docencia céntrase no Máster
Interuniversitario de Técnicas Estatísticas, co-organizado polas
tres universidades galegas, así como no Máster Universitario de
Bioinformática para as Ciencias da Saúde da Universidade da Coruña
e no Grao de Ciencia e Enxeñaría de Datos da Universidade da
Coruña. Desde marzo de 2020 é o presidente do Comité de Expertos
da Acción Matemática contra o Coronavirus creado polo Comité
Español de Matemáticas (CEMat).