Shenmue I & II teñen data de lanzamento

martes, 3 de xullo do 2018 Marcus Fernández

En abril SEGA anunciou que, anticipándose ao lanzamento de Shenmue III, ía publicar versións renovadas dos xogos Shenmue e Shenmue II, con versións para PlayStation 4, Xbox One e PC (Steam), e finalmente confírmase a data de lanzamento das primeiras entregas da grande obra de Yu Suzuki, o 21 de agosto.
O lote de Shenmue e Shenmue II xa está dispoñible para a súa reserva en edición física para consolas (recompensándose a confianza cun cartel de dobre cara protagonizado polos personaxes favoritos dos afeccionados a esta saga, así como unha carátula reversible con ilustracións orixinais), mentres que para ordenadores persoais só poderá adquirirse en formato recargable.
Os xogos narran a historia de Ryo Hazuki, protagonista que pretende vingar a morte do seu pai, para o que desentraña os segredos detrás dun misterioso artefacto coñecido como O Espello do Dragón, e nesta revisión ofrecerase a mellor experiencia desta saga até o momento, con funcións modernizadas, incluíndo resolución de pantalla totalmente escalable, elección entre esquemas de control modernos ou clásicos, e incluso a posibilidade de escoitar as voces orixinais en xaponés ou inglés.
Sobra dicir que Shenmue I & II contará con todas as características dos xogos orixinais, incluíndo os combates de jujitsu, as investigacións detectivescas, os elementos de rol e os minixogos, todo nun mundo aberto en tempo real, con ciclos de día e noite, cambios meteorolóxicos e incluso unha poboación civil que segue coa súas propias vidas, de aí que estes títulos fosen tan revolucionarios no seu día.

JPEG - 204.8 KB
Nos xogos non faltan os intensos combates de jujitsu
JPEG - 186.7 KB
As reservas das edicións físicas para consola teñen recompensa

Tráiler coa data de lanzamento de Shenmue I & II

PUBLICIDADE