Un novo sistema achega as videochamadas á televisión

Telefónica Móviles España e Createcna colaboraron na creación da aplicación 3G News Mobile Studio, que permite converter as videochamadas móbiles en sinais de vídeo para o seu uso en televisión, no que supón unha innovación que pode ser ven recibida polo sector audiovisual xa que achega un tipo de contido multimedia inédito nos medios actuais.
Con esta tecnoloxía, un xornalista pode conectar en directo cun informativo para transmitir imaxe e son sen precisar de máis ferramenta que o seu terminal de telefonía móbil UMTS, polo que é un sistema económico e versátil para este tipo de aplicacións, aínda que non dea unha calidade abraiante, pero que incluso abriría a porta ás achegas dos cidadáns, que poderían facer de xornalistas videográficos para cubrir calquera evento de actualidade ou para intervir nalgún programa no que actualmente só aceptan chamadas de voz.
A nova solución de Createcna converte así a calquera posuidor dun móbil 3G con cámara nun reporteiro que pode entrar en directo en calquera programa de televisión, o que agradecerán especialmente os informativos, para achegar información urxente, que se podería cubrir antes da chegada dunha unidade móbil de televisión.
O 3G News Mobile Studio pode recibir ata 6 sinais diferentes ó mesmo tempo con orixe nos teléfonos móbiles de Motorola E1000, V975 e V980, que funcionan coma unidades móbiles de peto, convertendo o seu sinal a unha toma SDI para poder empregala en tempo real nun mesturador de televisión.
Os sinais transmitidos polo móbil tamén se poden almacenar no sistema para a súa reemisión. Temos así un sistema que pode axudar a revolucionar a televisión e que podería permitir un novo estilo de xornalismo cidadán, así como axilizaría a achega de información de última hora dende calquera lugar con cobertura de telefonía 3G.