Unayta quere tirar proveito das súas tecnoloxías para recuperar a memoria do noso mar
luns, 30 de xaneiro do 2017
Unayta,
empresa de servizos tecnolóxicos avanzados emprazada en Milladoiro,
comezou ano premendo acelerador en materia de recursos para a
dixitalización e as melloras no manexo de grandes cantidades de
datos. Deste xeito, amais do pulo á súas ferramentas DigitalDocu e
JustBreadSoft (que
se van presentar polo miúdo perante as nosas empresas e profesionais
no Centro Demostrador TIC, o 8 de febreiro), está a sentar os
alicerces dun ambicioso proxecto para recuperar, nas súas palabras,
“unha parte importante da memoria do noso país”. Falamos,
máis en detalle, da memoria do noso mar e das xentes que nel
traballaron e viviron.
A
iniciativa, arestora en preparación, artellarase en función das
subvencións para proxectos promovidos polos Grupos de Acción Local
do Sector Pesqueiro (GALP), en colaboración diferentes confrarías.
Segundo informa Unayta, é de xustiza empregar a nosa innovación e
as tecnoloxías que temos desenvolvidas para reivindicar o mar
galego, por sempre un dos piares fundamentais da nosa sociedade.
O
roteiro a seguir, ao abeiro desta iniciativa, é pór en valor a gran
cantidade de documentación xerada ao longo de decenios pola
actividade mariñeira e marisqueira, unha documentación inxente que
“non sempre foi conservada de maneira correcta e á que non se lle
ten dado a importancia que realmente merece”. Este coñecemento
xerado está hoxe en día en mans de familias, confrarías e
asociacións profesionais. Componse de fotografías, documentación e
todo tipo de testemuñas. “Queremos apoiar a todos os colectivos
mariñeiros na recuperación da súa memoria fotográfica, na
dixitalización da súa documentación e na organización dos seus
arquivos”, informa Unayta, engadindo a certa obriga que teñen as
empresas galegas innovadoras de “aproveitar os seus coñecementos e
ferramentas para garantir a conservación dun patrimonio documental
pouco estudado pero de gran interese, tanto para a sociedade
mariñeira coma para o público investigador”.