Unha xornada no CITIC tende pontes ao financiamento do I+D+i empresarial
martes, 14 de abril do 2015
Esta mañá o Centro de
Investigación en Tecnoloxías da Información e as Comunicacións (CITIC) acolle
unha xornada sobre Oportunidades de
financiamento I+D empresarial período 2015-2020 organizado en colaboración coa
Axencia Galega de Innovación (GAIN) e co Centro de Desenvolvemento Tecnolóxico
Industrial (CDTI) para presentar as oportunidades de financiamento para os
proxectos de investigación e desenvolvemento que partan de empresas e centros
tecnolóxicos. Esta actividade está enmarcada nunha serie de eventos organizados
polo CITIC para o fomento da transferencia tecnolóxica cara o sector
empresarial.
A xornada comezou cunha presentación conducida polo coordinador do CITIC,
Manuel González Penedo, na que participaron a directora da área de Centros da
Axencia Galega de Innovación (GAIN), Sonia Pazos Álvarez, o adxunto a
Transferencia, Vicerreitorado de Investigación e Transferencia da UDC, Jerónimo
Puertas Agudo, e Luís Maeso de la Morena, da Dirección de Promoción e
Coordinación do CDTI.
Nesta presentación da xornada a representante de GAIN quixo salientar que “a visión
do CITIC como un punto de encontro entre a Universidade e a Empresa, combina
departamentos de I+D+i de empresas con investigadores provenientes do ámbito
universitario, parécenos que é, sen dúbida, unha formulación de éxito, o foco
no que deberiamos centrarnos nesta orientación” dada “a importancia da
coordinación e da colaboración, de impulsar e desenvolver proxecto colaborativos
entre empresas e centros de coñecemento (universidades, centros
tecnolóxicos...). Proxectos de innovación aberta, este novo paradigma que é a
innovación aberta, xa non é tan novo. É máis coñecido. GAIN ofrece unha
atención prioritaria a esta innovación aberta porque permite optimizar os
recursos, compartir os custos e os riscos do I+D+i e obter resultados que
permitan ás nosas empresas e aos nosos centros competir nun contexto global. Tanto
é así que GAIN concede axudas a proxectos de I+D+i de empresas que van en
colaboración con outras empresas ou con centros de coñecemento, que teñan foco
na transferencia e partan do tecido industrial e da empresa”.
Sonia Pazos Álvarez tamén apuntou que dende GAIN “complementámonos co CDTI,
cunha programación conxunta para que todos os proxectos teñan un financiamento
adecuado e ningunha idea de I+D+i quede sen financiamento”, completando a súa
intervención animando ás empresas e aos centros tecnolóxicos a que “sigan
apostando pola innovación aberta, apostando polo I+D+i colaborativa,
conseguindo resultados que xerarán crecemento, pulo, emprego e economía”.
Pola súa banda, Luís Maeo de la Morena comezou apuntando que o “CDTI é unha
entidade pública empresarial. Estamos adscritos ao Ministerio de Economía. A
nosa misión é apoiar ás empresas que deciden ser competitivas a través do
desenvolvemento de tecnoloxía. Nós premiamos e bonificamos todos os proxectos
nos que se produce unha colaboración conxunta entre empresas e universidade
para ser máis competitivos vías esta barreira de entrada”, e para afondar nesta
material realizou unha completa presentación sobre las liñas de axudas que
ofrecen para o I+D+i empresarial. Pero a participación do CDTI non se limita a
expor las súas liñas de axudas, senón que tamén chega en forma de xuntanzas
bilaterais coas empresas interesadas en participar nas mesmas, de xeito que
este encontro ten unha parte claramente produtiva para os asistentes, que poden
iniciar así os contactos para que os seus proxectos poidan acadar o
financiamento preciso para poder chegar a bo porto.
A xornada celebrada na sede do CITIC no coruñés Campus de Elviña contou tamén
coa presentación dun par de casos de éxito que correron da man de Juan Ángel
Ferreiro Lage (Indra Software Labs) e Rafael Ave Souto (Emetel Sistemas).
- A xornada celebrada no CITIC busca contribuír á transferencia tecnolóxica facilitando a busca de financiamento para o I+D+i empresarial