X reacciona á proliferación de contidos falsos xerados con IA

A rede social X anunciou un cambio nas súas normas para limitar a difusión de contido enganoso sobre conflitos armados xerado con intelixencia artificial. A partir de agora, os creadores que participen no programa de reparto de ingresos e publiquen vídeos de guerra creados con IA sen indicar claramente que se trata de material sintético poderán ser suspendidos do sistema de monetización durante 90 días.
A medida foi anunciada pola responsable de produto da compañía, Nikita Bier, quen sinalou que en momentos de conflito «é fundamental que as persoas teñan acceso a información auténtica sobre o que ocorre no terreo». Segundo explicou, a capacidade actual das ferramentas de IA para crear vídeos realistas facilita a aparición de contido que pode inducir a erro aos usuarios.
A política céntrase especificamente nos creadores inscritos no programa de reparto de ingresos para creadores, que permite obter ingresos publicitarios en función da popularidade das publicacións. Se un creador comparte vídeos de conflitos armados xerados con IA sen incluír unha advertencia clara, será expulsado do programa durante tres meses. En caso de reincidencia, a expulsión será permanente.
Aseguran que identificarán este tipo de contido mediante varios mecanismos, como as Notas da Comunidade e a detección de metadatos ou sinais asociados ás ferramentas de xeración automática de contidos.
O programa de reparto de ingresos de X incentiva a aparición de contido sensacionalista ou deseñado para xerar interaccións masivas, polo que a difusión de vídeos falsos de guerras ou ataques é unha práctica que nos últimos días fíxose moi popular para atraer visualizacións e ingresos, o que pretende mitigar a nova política.
X conta cun sistema que permite aos usuarios activar un indicador nas publicacións para sinalar que inclúen material xerado por intelixencia artificial, aínda que é unha función moi pouco visible e masivamente ignorada.