Xornada en Compostela para afondar da captación de financiamento para novas empresas de base tecnolóxica

Facilitar a creación e o desenvolvemento de novas empresas de base tecnolóxica ou cun perfil claramente innovador é o obxectivo que busca a Consellería de Economía e Industria ao promover a organización da xornada Instrumentos de Financiamento para Startups Innovadoras: Capital Risco e Business Angels, que se desenvolverá o próximo 29 de setembro en Santiago de Compostela.
O encontro organizado por IGAPE e BIC Galicia no marco do programa comunitario AT-Venture pretende facer posible que os emprendedores e empresas dispostas a poñer en marcha novos proxectos cun perfil innovador coñezan en profundidade todos os instrumentos de financiamento que existen no mercado, máis alá do financiamento bancario convencional.
A xornada servirá para a divulgación de instrumentos de financiamento como o capital risco e os business angels (investidores privados) cara os impulsores de novos proxectos empresariais especialmente innovadores, así como cara aqueles profesionais e axentes implicados na creación e desenvolvemento de novas empresas baseadas nas TIC.
O programa, que se desenvolverá ao longo dunha mañá, inclúe relatorios, mesas redondas e tempo para networking. Nunha das mesas redondas sobre o financiamento para emprendedores e PEME innovadoras participará o director de Xesgalicia, Javier Aguilera, a sociedade xestora de fondos de capital risco da Xunta e o director xeral de I+D+i, Ricardo Capilla, xunto con Pedro Granado, director de relacións institucionais de Enisa, e Miguel Ángel García, do departamento de promoción da innovación do CDTI.
Ademais, a xornada contará coa participación do director de SeedRocket, Marek Fodor, co fundador de Atrápalo, que ofrecerá un relatorio centrado nos aspectos a ter en conta para identificar unha boa oportunidade de investimento.
Outra das actividades é a dunha conferencia orientada a novos negocios para achegarlles as habilidades necesarias para atraer investidores privados ou business angels e formar, a partir de experiencias reais, sobre o proceso de captación de fondos nestes ámbitos. Nel participarán David Bello, promotor de webPhone, e Diego Cobelo, promotor de Classora.
Para pechar o encontro celebrarase unha mesa redonda sobre fondos de co investimento público privados e políticas fiscais neste ámbito, contando con relatores como Pedro Regojo, socio de Garrigues, que achegará unha proposta fiscal para España, e Ricardo Luz, de Invicta Angels, que falará sobre os fondos de co investimento en Portugal.
O Foro de Investimento Galicia presentase como un espazo de encontro entre investidores privados, redes de business angels e emprendedores con proxectos empresariais de alto potencial de crecemento desenvolvidos desde ou para Galicia. Ten como obxectivo promover o desenvolvemento de actividades conducentes a reducir os problemas de financiamento co que se atopan as empresas innovadoras nas súas fases iniciais.
Este foro desenvólvese no marco do programa europeo AT Venture, no que participa o IGAPE, xunto con outras rexións de España, Portugal, Irlanda e Escocia, e que persegue a promoción e desenvolvemento de empresas innovadoras, así como a súa difusión e mellora do acceso aos instrumentos de financiamento destas start-ups, especialmente sociedades e redes de investimento privado.