Xornal anuncia que apostará forte polos contidos dixitais
xoves, 4 de agosto do 2011
Este xoves os nosos quioscos fican certamente
baleiros de información en galego, xa que se trata do día previsto para o cese
da publicación de Xornal en edición papel, tal como
anunciamos onte, a última das nosas publicacións que diarias que apostaba
pola nosa lingua (combinándoa co castelán, todo hai que dicilo) e que se
comprometera a empregala en algo máis que unha columna para xustificar unha posíbel
subvención. Con todo, tendo en conta o que nos contan dende o medio galego, cómpre
non esquecer que a Rede existe, e que entre outras cousas ben pode servir para darlle
continuidade a un proxecto destas características. Así o fixeron outros
xornais, así probablemente acaben por facelo The New York Times e The Wall
Street Journal e
así o vai facer Xornal, un diario con cumprida experiencia nas redes e con
potencial para, como eles mesmos din, “apostar
polo futuro”.
O camiño será difícil, precisamente porque un
camiño que se fai cada día, pero non intransitábel. Experiencias previas de
referencia hai de abondo, como por exemplo a do Jornal de Brasil, unha das
grandes cabeceiras do país irmán, transformado en canle en liña no pasado verán
“para ser pioneiro en apostar só polo
dixital”, sinálase dende o medio galego. Jornal de Brasil, por certo seguiu
o ronsel do Seattle Post-Intelligencer, que se afianzou na Internet logo de
case un século e medio de edicións tradicionais. A maiores, outras cabeceiras
como The New York Times están a barallar a día de hoxe a posibilidade de
tirarlle o máximo partido ás redes dixitais, converténdoas no seu único eido de
actividade comercial; de feito, segundo recorda Xornal, o diario xa atopou a día
de hoxe unha nova fonte de ingresos: o pago na rede.
Esta aposta polas novas canles de comunicación
vai ser extensíbel, no caso da empresa galega, a tódolos seus recursos. Segundo
dan a entender fontes do medio, o cambio de rumbo farase de xeito que afecte o
menos posíbel aos traballadores, aínda que sobre este punto aínda non hai nada
confirmado. Este proceso de dixitalación tamén
afectará aos colaboradores habituais, integrantes das tres principais
forzas políticas da nosa terra e dos eidos da cultura e da información que
tiveron até o de agora o seu espazo na edición en papel do diario. Segundo se
informa, seguirán a telo na nova liña dixital: “Malia o fin da edición en papel do diario, esas grandes firmas volverán
a estar presentes na rede pero non por iso deixarán de ser importantes”. Firmas
como Xoán Antón Pérez-Lema, Xesús Palmou, Pilar García Negro, José Luis
Sucasas, Encarna Otero, Rafael Cuiña, Pablo González Mariñas, Jesús Parga,
Teresa Táboas, Luciano Fariña, Antonio Campos Romay, Xavier Vence, Iria
Salgado, Carme Adán ou José Luis Martín Palacín. “Amais de ofrecer aos lectores as súas expertas opinións sobre o devir
da actualidade”, dise dende Xornal, “soportaron
estoicamente as chamadas da sección de Opinión para apuralos porque a rotativa
mandaba e había que chegar a peche”. Agora, engaden, xa non será así, agora
haberá máis tempo para ofrecer aos lectores “unha visión plural da realidade”.