Yoigo ofrecerá móbiles "cun modelo semellante ao leasing de coches"

O cuarto operador móbil con rede propia en España, Yoigo, anunciou hoxe durante o Mobile World Congress que a partir do 5 de marzo os seus clientes terán unha nova posibilidade dentro do programa compra de móbiles con pagamento a prazos, que vén a ser unha especie de leasing no que os clientes, tras do pagamento inicial por un novo móbil e aboar 24 cotas mensuais (con cantidades que irán en función da tarifa contratada) poderán facer un pagamento final para facerse coa propiedade do terminal ou devolver o dispositivo (aforrando este último pagamento e podendo optar por renovar unha vez máis o móbil pola mesma fórmula).
Yoigo tamén anunciou que continuará a espallar a súa rede 4G, xa presente nas cidades das provincias de A Coruña e Pontevedra, e que antes de rematar este mes promete chegar tamén á provincia de Ourense (xunto a outras 9 provincias adicionais), como xa anunciaron o venres pasado.
Os clientes de contrato e tarxeta de Yoigo tamén poderán gozar a partir do verán dunha mellor protección grazas a novas medidas para limitar os cargos excesivos orixinados por servizos de pagamento adicional, limitándose de xeito predeterminado os servizos Premium de subscrición, pedindo confirmación por SMS ao superarse certa cantidade de consumida e facilitando información e sistema de baixa dos distintos servizos que tantas desagradables sorpresas teñen ocasionado nas facturas telefónicas.