eBay lanza un portal de comercio xusto na Rede

O portal de subastas en Internet, eBay, vén de presentar unha páxina web verde para os seus usuarios máis solidarios e comprometidos coa ecoloxía que tén como obxectivo fomentar o comercio xusto a través da Rede e axudar ás persoas máis necesitadas (que, precisamente, sempre son as máis explotadas).
O sitio, que foi lanzado co nome de WorldofGood.com, está destinado a aquelas persoas que presumen de manter unha vida saudable e que están dispostas a axudar ás persoas máis desfavorecidas desta sociedade, na que o consumismo é a marca de referencia.
Os usuarios deste portal poden atopar nel dende roupa elaborada con produtos orgánicos ata viño ecolóxico, pasando por xoguetes ou bisutería feita á man procedente de distintos países do mundo; e todo iso a prezos fixos (a diferenza do portal de subastas), que non inclúen os beneficios para os intermediarios, e con información sobre ónde e cómo se elaboran os produtos ofrecidos.
O buscador permite facer procuras por países ou por categorías de produtos e incluso facer unha estima do prezo que queremos gastar para dar cos produtos axeitados á nosa carteira.
A idea xurdiu hai uns tres anos cando o actual xefe do proxecto, Robert Chatwani, viaxou á India e caeu na conta da cantidade de produtos artesanais que podían suscitar algún tipo de interese na Rede, ao tempo que, a través da súa venda, se podería axudar ao propio comerciante e combatir a pobreza do seu país de orixe.